АНМН- кафили амнияти Тоҷикистону минтақа

Душанбе, 30.07.2014. (АМИТ «Ховар», Мавҷуда Анварӣ). — Намояндагони коллеҷи сарҳадии Созмони амният ва ҳамкорӣ дар Аврупо (САҲА) барои ҳайати роҳбарикунанда таҳти роҳбарии директор Хенрик Рачковски ба Маркази таълимии шуъбаи кадрҳои Агентии назорати маводи нашъаовари назди Президенти ҶТ ташриф оварданд.Ҳайати меҳмонон бо сохтори марказҳои кинологӣ ва таълимӣ, банақшагирӣ ва ташкили фаъолият, санадҳои меъёрии ҳуқуқӣ, ҷанбаҳои истифодаи сагҳои хизматӣ дар ошкор намудани маводи нашъаовар, инчунин бо фаъолияти Маркази таълимӣ, ки дар он на танҳо кормандони мақомоти ҳифзи ҳуқуқи Тоҷикистон, балки аз мақомоти зиддимухаддиротии Ҷумҳурии Исломии Афғонистон низ ихтисоси худро такмил медиҳанд, шинос шуданд.”Мо кӯшишҳои Ҳукумати Ҷумҳурии Тоҷикистонро дар соҳаи мубориза бар зидди муомилоти ғайриқонунии маводи нашъаовар, аз ҷумла саҳми агентиро баланд арзёбӣ менамоем. Саҳми шумо дар қатъ намудани интиқоли маводи нашъаовар кафили амният на танҳо дар Тоҷикистон, балки дар минтақа мебошад”, иброз кард Хенрик Рачковски.