Баррасии ҳамкориҳои саноатии Тоҷикистону Ҳиндустон

Душанбе, 07.07.2014 (АМИТ «Ховар», Фарзонаи Давлат).- Имрўз вазири саноат ва технологияҳои нави Ҷумҳурии Тоҷикистон Шавкат Бобозода бо сардори Раёсати саноати вазнини Вазорати саноати вазнин ва соҳибкории давлатии Ҳукумати Ҷумҳурии Ҳиндустон ҷаноби Вишваҷит Саҳай ва ҳайати Ширкати давлатии саноати вазнини Ҳиндустон мулоқот намуд.Тавре ки дар ин бора аз Вазорати саноат ва технологияҳои нав хабар доданд, дар мулоқоти мазкур масъалаҳои густариши ҳамкориҳои дуҷониба оид ба лоиҳаҳои марказҳои хизматрасонии роҳҳои оҳан, коркарди ангишт ва таҷҳизоти куҳӣ барои саноати ангишт, бунёди корхонаи истеҳсоли семент мавриди баррасӣ қарор дода шуд. Гуфта мешавад, ки ҷонибҳо аз натиҷаи вохурӣ изҳори қаноатмандӣ намуда, ба паҳлуҳои дигари ҳамкориҳо таваҷҷуҳ зоҳир карда, иброз доштанд, ки ҳамкориҳои дуҷониба дар бахшҳои гуногуни саноат мавриди омўзиши тарафҳо қарор хоҳад гирифт.