Беҳбудиҳои назаррас дар ДМИТ
Душанбе, 18.07.2014. (АМИТ «Ховар», Раъно Нусратуллозода).-Имрӯз зимни нишасти матбуотӣ ректори Донишкадаи молия ва иқтисоди Тоҷикистон (ДМИТ) Ашӯрбой Солиев оид ба фаъолияти донишкада дар соли таҳсили 2013-2014 маълумоти муфассал дода, аз ҷумла зикр намуд, ки дар соли таҳсили нав қабули довталабон аз рӯи 8 равия: баҳисобгирии бухгалтерӣ, таҳлил ва аудит, технология ва низоми иттилооти дар иқтисодиёт, менеҷмент, молия ва қарз, ҳуқуқи иқтисодӣ, андоз ва андозбандӣ, хадамоти гумрук ва молия ва қарз дар фаъолияти иқтисодии берунӣ аз рӯи дараҷаи магистр дар шакли буҷавӣ ва шартномавӣ ба нақша гирифта шудааст. Дар донишкада раванди таълим дар шакли таҳсилоти рӯзона ва ғоибона аз рӯи дараҷаи бакалавр, мутахассис, маълумоти олии дуввум ва магистратура дар шакли буҷавӣ ва шартномавӣ бо забонҳои давлатӣ ва русӣ ба роҳ монда шудааст.Ашӯрбой Солиев зикр намуд,ки ҳадафи асосии донишкада таъмин намудани бозори меҳнат бо кадрҳои баландихтисоси соҳаҳои мухталифи молия ва иқтисод мутобиқи стандартҳои ҷаҳонӣ мебошад. Инчунин соли ҷорӣ донишкада аз аттестатсияи миллӣ оид ба пешбурди раванди таълим ва аз аккредитатсияи миллӣ гузашта, соҳиби иҷозатнома ва шаҳодатнома гардида, дар самти баланд бардоштани сатҳи сифати таълим ва мутобиқ намудани онҳо ба меъёрҳои байналмилалӣ, пурра гузаштан ба шакли электронии идоракунии донишкада, гузаштани ихтисосҳои алоҳида аз аккредитатсияи минтақавӣ ва байналмилалӣ корҳо идома ёфта истодаанд.