Бо ёрии дружиначиён 33 ҷиноят ошкор шуд
Душанбе, 25.07.2014. (АМИТ «Ховар», Мукаддас Темурзода).-Дар давоми нимсолаи аввали соли 2014 дружиначиёни ихтиёрӣ дар ҳамкорӣ бо кормандони мақомоти корҳои дохилӣ дар гузаронидани беш аз 65 чорабинӣ, аз ҷумла 14 чорабинии сатҳи сиёсию давлатӣ, 20 маъракаи калони фарҳангӣ ва 10 маъракаи варзишӣ иштирок намудаанд.Тавре ки ВКД ҶТ хабар медиҳад, дар давоми нимсолаи аввали соли 2014 дар ҷумҳурӣ аз 9 ҳ. 339 ҷиноят ба қайд гирифта шуд, ки 93,4 фоизи он кушода шуда, теъдоди содиршавии бисёр ҷиноятҳо аз қабили дар ҳолати мастӣ, аз тарафи шахсони пеш ҷиноят содирнамуда, одамкушӣ, таҷовуз ба номус, роҳзанӣ, ғоратгарӣ, дуздӣ, ба гарав гирифтан, бо истифода аз яроқи оташфишон, гардиши ғайриқонунии яроқ кам гардидааст. Сафи дружинаҳои ихтиёрӣ аз ҳисоби 627 нафар ихтиёриёни нав қабулшуда боз ҳам зиёдтар гардидааст. Ҳар шабонарӯз на кам аз 550-600 нафарӣ дружиначиёни ихтиёрӣ дар якҷоягӣ бо кормандони милитсия барои таъмини тартиботи ҷамъиятӣ ба маҳалла, минтақа ва шаҳракҳои истиқоматии худ ба хизмат баромада, тартиботи ҷамъиятиро назорат ва ҳуқуқвайронкунандагони тартиботро ошкор намуда, ба ҷавобгарӣ ҷалб менамоянд.Дар ҳамкории бевоситаи дружиначиёни ихтиёрӣ бо кормандони милитсия дар давраи ҳисоботӣ 33 ҷиноят кушода шуда, як ҷинояткори дар кофтуков қарордошта дастгир ва 2 ҳ. 129 нафар ҳуқуқвайронкунандаи маъмурӣ ошкор шудааст, ки ин аз натиҷаҳои ҳамин давраи соли гузашта бештар мебошад.Бояд зикр намуд, ки барои кори хуб ва иштироки фаъолона 75 нафар дружиначиёни ихтиёрӣ бо ҳар гуна тӯҳфаҳо мукофотонида шудаанд.