Боздошти қочоқчӣ ҳангоми убури сарҳад

Душанбе, 1.07.2014. (АМИТ “Ховар”, Зарангези Латиф).- Имрӯз дар Фурудгоҳи байналмилалии шаҳри Хуҷанд ҳангоми азназаргузаронии гумрукӣ шаҳрванд Азизов Мунаввар, соли таваллудаш 1987, истиқоматкунандаи ноҳияи Нуробод боздошт гардид. Бино бар чусту чолокии кормандони Хадамоти гумрук ҳангоми муоинаи боғоҷи номбурда дар қабатҳои ҷуздони чармӣ маводи сахттаъсири навъи героин ёфт шуд. Азизов мехост 2 килову 270 грам героинро ҳамчун қочоқ тариқи сарҳад интиқол диҳад.Айни ҳол нисбат ба ин ҷиноят бо дастрасии моддаҳои 200 ва 289 Кодекси ҷиноии Ҷумҳурии Тоҷикистон парванда оғоз шуда, тафтишот идома дорад.