Бунёди боғҳои мевадиҳанда аз ҷониби АИК ҶТ

Душанбе, 16.07.2014. (АМИТ “Ховар”, Ситораи Боймурод).- Бо иштироки бевосита ва ёрии амалию методии олимони институти боғпарварию сабзавоткорӣ дар шабакаи таҷрибавии зироатҳои субтропикии ноҳияи Ҷ. Румӣ, хоҷагии таҷрибавии “Сунбула”-и н. Ҳисор ва филиали институт дар вилояти Суғд дар майдони 3 гектар боғи коллексионии навъҳои нодири дарахтони мевадиҳанда ва ток бунёд карда шуд.Тавре ки дар ин бора Академияи илмҳои кишоварзии Тоҷикистон хабар додааст, кормандони Институти мазкур дар қитъаҳои наздиҳавлигии деҳаи “Қади Об”-и ноҳияи Роғун дар майдони 2 гектар ва дар деҳаи “Бӯстон”-и ноҳияи Файзобод дар майдони 2 гектар ниҳол, ки бо мусоидати Ҳукумати Ҷумҳурии Тоҷикистон аз давлати Сербия ворид карда шудаанд, боғи интенсивӣ (сермаҳсул) бунёд намуданд.Инчунин аз ҳисоби ниҳолҳои аз давлати Сербия воридгардида, дар заминҳои шабакаи таҷрибавии Файзобод дар майдони 5 гектар боғи себ ва дар майдони беш аз 1 гектар боғи олу бунёд карда шуд.