Бунёди машқгоҳи автоматии мошинронӣ дар шаҳри Душанбе

Душанбе, 7.07.2014. (АМИТ «Ховар», Лайло Тоирӣ).- Роҳбарияти Ташкилоти Ҷамъиятии Мададгори Мудофиа барои таъмиру таҷдиди машқгоҳи мошинронии автоматӣ дар шаҳри Душанбе иқдом намуда, айни ҳол дар ин иншоот корҳои таъмиру тармим ва сохтмону азнавсозӣ идома дорад. Бино ба иттилои котиби матбуотии ТҶММ Абдуракиб Қодиров, машкгоҳ имрӯз ба талаботи доир кардани машқҳои амалии ронандагӣ барои касбомўзон мувофиқ кардашуда, бо тамоми таҷҳизоти техникӣ ва асбобҳои аёнии таълимӣ ҷиҳати омўзонидан ва сайқал додани малакаи амалии ронандагӣ дар раванди омодасозии соҳибкасбони ин соҳа муҷаҳҳаз хоҳад гардид.Ташкили дарсҳои амалӣ дар ин машқгоҳи мошинронӣ имкон медиҳад, ки маҳорати ронандагони оянда дар идораи воситаҳои нақлиёт боло рафта, ҳолати риояи қоидаҳои ҳаракат дар роҳ, инчунин пешгирӣ аз вазъияти садамавӣ ва рух додани ҳодисаҳои нохуши нақлиётӣ беҳтар гардад.