Чаро ҳодисаҳои ғарқшавии одамон афзоиш ёфта истодааст?
Душанбе, 17.07.2014.(АМИТ «Ховар», Мавҷуда Анварӣ).- «Боиси ташвиш аст, ки сол ба сол ҳодисаҳои ғарқшавии одамон афзоиш ёфта истодааст. Ҳарчанд, ки Кумита ба ин масъала диққати махсус медиҳад, вале шумораи ғарқшудагон нисбат ба ҳамин давраи соли гузашта 3 нафар зиёд мебошад», — иброз намуд Хайриддин Абдураҳимов раиси Кумитаи ҳолатҳои фавқулодда ва мудофиаи шаҳрвандӣ, зимни нишасти матбуотӣ ба хабарнигорон. Хайриддин Абдураҳимов ҳамчунин илова намуд, ки аз 31 нафаре, ки дар соли равон ғарқ шудаанд, 11 нафараш то сини 17 сола буда ва 20 нафари дигараш аз 17 сола боло мебошад. «Дар баробари ин наҷотдиҳандагони Кумита дар 149 амалиёти кофтуковӣ-наҷотдиҳӣ иштирок намуда, 26 нафарро наҷот дода, инчунин дар натиҷаи корҳои бартарафкунии наҷотдиҳӣ, сангрезӣ, гузаронидани корҳои кофтукови рӯиобӣ ва зериобӣ 21 ҷасадро дарёфт карданд», — иттилоъ дод раиси Кумитаи ҳолатҳои фавқулодда ва мудофиаи шаҳрвандӣ.