Даст доштани ноболиғон дар ҷиноятҳои ахлоқӣ

Душанбе, 18.07.2014. (АМИТ «Ховар», Муқаддас Темурзода).- Зимни нишасти матбуотие, ки имрӯз дар Вазорати корҳои дохилӣ баргузор гардид, сардори ин мақомот Раҳимзода Рамазон Ҳамро изҳор дошт, ки дар ин давра 11 ҳолати ғайриқонунӣ додани таълимоти динӣ ошкор гардид.Тибқи иттилоъ дар ин таълимгоҳҳо 356 нафар ноболиғон ва ҷавонон ба таҳсил фаро гирифта шуда, 219 ҳолати монеъ шудан ба гирифтани таълимоти ҳатмӣ муайян ва ошкор гардидааст. Ҳамчунин нисбат ба 921 қонунвайронкунандагон ва падару модарони онҳо чораҳои қонунӣ андешида шудааст. «Аз ҷониби ноболиғону ҷавонон 3 ҳ. 62 ҷиноят содир гардид, ки содиршавии он нисбат ба соли гузашта афзудааст. Бояд зикр намуд, ки дар ин давра 6 ҳолати муноқишаҳои гурӯҳӣ ба қайд гирифта шуда, дар натиҷаи бардоштани ҷароҳати вазнини ҷисмонӣ як нафар хонандаи мактаби миёна ба ҳалокат расид», — гуфт Раҳимзода Рамазон Ҳамро. Дар посух ба саволи хабарнигорон Вазир иброз дошт, ки дар самти ҷиноятҳои вобаста ба ахлоқ, фоҳишагӣ ва даллагӣ, дар давраи ҳисоботӣ 593 ҷиноят ошкор гардида, аз як ҳазору 777 фоҳишаи дастгир шуда 30 нафараш ноболиғон мебошанд, ки ин боиси нигаронии ҷомеа мебошад.