Дастовардҳои Академияи илмҳо дар нимсолаи аввал

Душанбе, 10.07.2014. (АМИТ «Ховар», Раъно Нусратуллозода).-Дар нимсолаи аввали соли 2014 олимони Академияи илмҳо таҳқиқотро аз рӯи 70 мавзӯи илмӣ-таҳқиқотии бунёдӣ ва 31 мавзӯи амалӣ идома дода, натиҷаҳои назаррас ба даст овардаанд, гуфт зимни нишасти матбуотӣ президенти Академияи илмҳои Ҷумҳурии Тоҷикистон Фарҳод Раҳимӣ. Аз ҷумла, таҳқиқот дар соҳаҳои илми математика дар сатҳи баланд ба роҳ монда шуда, доир ба физикаи ҳолати конденсӣ, оптика ва электроникаи квантӣ, акустика натиҷаҳои муҳим ба даст омадаанд. Дар соҳаи астрофизика бо истифода аз технологияҳои муосири компютерӣ мушоҳидаҳои метеорҳо, кометаҳо, асттероидҳо ва пораҳои ҳамсафарҳои сунъии Замин гузаронида шудаанд.Дар нишасти матбуотӣ инчунин гуфта шуд, ки дар шаш моҳи соли ҷорӣ Академияи илмҳо ба Ҳукумати ҶТ ва вазорату идораҳои ҷумҳурӣ 67 пешниҳод ва хулосаҳоро оид ба ҳамкории байналмилалии илмӣ ва илмию техникӣ бо давлатҳои аъзои Иттиҳоди давлатҳои мустақил, Созмони ҳамкории Шанхай, Иттиҳоди ҳамкориҳои иқтисодии АвроОсиё ва давлатҳои хориҷи дур ва наздик омода ва барои баррасӣ пешниҳод карда шудаанд.