Даъвати Г. Шарофзода аз волидон

Душанбе, 30.07.2014. (АМИТ «Ховар», Мавҷуда Анварӣ). — Гавҳар Шарофзода-раиси Кумитаи забон ва истилоҳот имрӯз дар нишасти матбуотӣ ба хабарнигорон гуфт, ки кумита дар 16 ҷаласаи Шӯрои бадеии Корхонаи воҳиди давлатии «Тоҷиккино» ширкат намуд. Дар ҷаласаҳо зиёда аз 67 филми аз забонҳои туркӣ, арабӣ, англисӣ ва ҳиндӣ ба забони тоҷикӣ тарҷумашуда, ки аз ҷониби студияҳои «Нурангез», «Арш», «Симо Продакшн», «Килк», «Ҳамсадо», «Тоҷикфилм» ва «Асар» пешниҳод гардида буданд, мавриди баррасӣ қарор дода шуд. Ҳангоми баррасӣ оид ба истифодаи калимаю ибораҳо, ифода ва риояи меъёри забони адабӣ эроду пешниҳодҳои мушаххас манзур карда шуд.Гавҳар Шарофзода дар идомаи суҳбаташ аз афзоиши истифодаи калимаҳое бемантиқ миёни ҷавонон изҳори нигаронӣ кард. Ӯ сарчашмаи пайдо шудану истифодаи чунин калимаҳоро тарбияи нодуруст дар хонавода донист ва аз волидони тоҷик даъват кард, ки ба шеваи гуфтори фарзандонашон аз хурдсолӣ таваҷҷуҳ кунанд. Раиси кумита, инчунин афзоиши номҳои туркӣ дар Тоҷикистонро ғайриқонунӣ хонд.