Хатсайри нави — Душанбе — Панҷакент — Душанбе

Панҷакент, 30.07.2014 (АМИТ «Ховар», Гулбаҳор Худоибердиева) Аввалин тайёра дар масири Душанбе — Панҷакент — Душанбе, дар хатсайри нави ҳавоӣ субҳи рӯзи 30-юми июл аз фурудгоҳи Душанбе ба Панҷакент фуруд омад. Пас аз нишастани тайёраи тамғаи АН — 26 ба фурудгоҳи Панҷакент меҳмононро бо рақсу бозӣ ва карнайю сурнай пешвоз гирифтанд. Дар маросими кушодашавии хатсайри ҳавоӣ меҳмонон аз шаҳрҳои Душанбеву Хуҷанд рӯзноманигорон, роҳбарони ташкилоту идораҳо ширкат намуданд. Дар суханронии муовини роҳбари ширкати «Тоҷик Эйр» Икром Мавлонов, таъкид шуд, ки ин тӯҳфае хоҳад шуд ба 90 солагии авиатсияи тоҷик. Инчунин муовини раиси вилояти Суғд Хайрулло Амонулло, муовини сардори департаменти авиатсияи гарждании вазорати нақлиёт Анвар Нуров ҳам дар баромадҳои хеш аз кушодашавии хатсайри Душанбе — Панҷакент хуш истиқбол намуданд.