Истироҳати наврасони Хоруғ дар Суғд

Хоруғ, 23.07.2014. (АМИТ «Ховар», Файз Мирасан) Боз 81 нафар толибилмони муассисаҳои таълимии шаҳри Хоруғ ба урдугоҳҳои тобистонаи берун аз ҳудуди вилоят сафар намуданд. Ин гурӯҳи толибилмон тайи 15 рӯз дар урдугоҳҳои вилояти Суғд ба истироҳату фароғат фаро гирифта мешаванд.Соли равон барои истироҳату фароғати толибилмони ВМКБ шароитҳои нав фароҳам оварда шуданд. Бо дастгирии мақомоти маҳаллии ҳокимияти давлатии вилояту шаҳри Хоруғ имсол бори нахуст теъдоди зиёди хонандагон ба фароғатгоҳҳои тобистонаи шаҳру навоҳии ҷумҳурӣ сафарбар шудаанд.Мудири шуъбаи маорифи шаҳри Хоруғ Бибигул Ҷумъаева гуфт, ин тадбир ба хотири боз ҳам таҳким бахшидани дустию рафоқат миёни кӯдакону наврасони манотиқи мухталифи кишвар мебошад.Бо кӯмаки мақомоти маҳалии ҳокимияти давлатии вилоят ва гурӯҳе аз соҳибкорон то ҳол беш аз 500 нафар толибилмони макотиби шаҳр ба урдугоҳҳои берун аз вилоят ба муддати 15 рӯз ба истироҳату дамгирӣ фиристонида шуданд. Волидон аз ин иқдоми роҳбарияти вилояту шаҳри Хоруғ изҳори хушнудӣ мекунанд ва ҷиҳати роҳандозӣ намудани чунин амали хайр миннатдорӣ баён мекунанд.