Кӯмаки «Тоҷикматлубот» ба тарбиятгирандагони Мурғоб
Душанбе, 18.07.2014.(АМИТ «Ховар», Марзия Саидзода).-Дар моҳи шарифи Рамазон, ки моҳи хайру эҳсон аст, Раёсати Иттифоқи «Тоҷикматлубот» -и ҷумҳурӣ ҷиҳати кӯмак ба тарбиятгирандагони интернати наздимактабии №7 -и ноҳияи дурдасти Мурғоб чор ҳазор сомонӣ ирсол намудааст. Ҳамчунин ба оилаҳои камбизоат собиқадарони соҳа дар ҳаҷми 5 ҳазор сомонӣ кӯмаки моддӣ расонида шуд. Сироҷиддин Валиев -раиси Раёсати Иттифоқи «Тоҷикматлубот»-и ҷумҳурӣ 18 июл дар ҷараёни нишасти матбуотӣ ба хабарнигорон доир ба фаъолияти ин ниҳод дар зарфи шаш моҳи соли ҷорӣ гузориш дода, гуфт, ки даромади умумии аз натиҷаи фаъолият бадастомада беш аз 58 миллион сомониро ташкил дод, ки афзоиши он нисбати ҳамин давраи соли сипаригардида 9 миллион сомонӣ зиёд аст.Ҳамзамон дар ин давра ҳаҷми чаканаи мол ба 73 миллион сомонӣ расонида шуда, ки аз он беш аз 18 миллион сомониро муомилоти моли муассисаҳои хӯроки умумӣ ташкил медиҳад. Ин нишондод нисбат ба соли 2013 мутаносибан 3 ва 8 миллион сомонӣ зиёд аст.