Кумакаи КҶВС ба Шаҳбол Мирзоев

Душанбе, 29.07.2014 (АМИТ “Ховар”, Фарзонаи Давлат).- Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ҷиҳати дастгирии иҷтимоии ҷавонон дар арафаи иди саиди Рамазон дар доираи Барномаи миллии рушди иҷтимоии ҷавонон дар Тоҷикистон барои солҳои 2013-2015, ба собиқ сарбози қисми низомии 2620 Қўшунҳои сарҳадии Кумитаи давлатии амнияти миллии Ҷумҳурии Тоҷикистон — Шаҳбол Мирзоев, ки айни замон дар яке аз беморхонаҳои шаҳри Хуҷанд бистарӣ шудааст, дар ҳаҷми 4000 сомонӣ кўмаки молиявӣ расонид.Тавре ки дар ин бора Ҷамолиддин Нуров, котиби масъули Кумитаи мазкур хабар дод, аз ҷониби роҳбарияти Кумита ба Шаҳбол Мирзоев барои мутолиа китобҳои гуногун аз ашъори ниёгон ва муосир супорида шуд. Гуфта мешавад, ки ҳадаф аз ин иқдомот саҳм гузоштан дар баровардани ниёзи як ҷавони кишвар мебошад. Зеро ояндаи кишвар дар дасти ҷавонон буда, онҳо умед ва такягоҳи ҳар як кишвару миллат мебошанд.Инчунин, масъулини Кумита зимни аёдат ва сўҳбат, ба Шаҳбол Мирзоев пешниҳод намуданд, ки Кумита омодааст, дар ҳамкорӣ бо Вазорати маориф ва илми Ҷумҳурии Тоҷикистон дар сурати мавҷуд будани хоҳиши ў, барояш дар шароити беморхона курсҳои махсуси забономузӣ ва касбомўзиро ташкил намояд.