Мулоқоти Н.Буриев бо Д. Дан

Душанбе, 14.07.2014. (АМИТ «Ховар», Кристина Эрлих). -Мулоқоти муовини авали вазири рушди иқтисод ва савдои кишвар Неъматҷон Буриев бо ҳайати Хазинаи байналмиллалии асъор таҳти сарварии роҳбари миссия Ҷонатан Дан 12 июл дар Душанбе баргузор гардид. Тавре аз вазорати мазкур ба АМИТ «Ховар» иттилоъ доданд, зимни мулоқот масоили рушди иҷтимоӣ -иқтисодии кишварҳо дар нимсолаи аввали соли 2014 , аз он ҷумла нишондиҳандаҳои макроиқтисодӣ, ҳаҷми маҷмӯи маҳсулоти дохилӣ ва сатҳи таваррум мавриди баррасӣ қарор гирифт.Ҷонибҳо ҳамчунин суръати рушди саноат ва хоҷгии қишлоқ, тиҷорат ва хизматрасонӣ, таъсиси корхонаҳои саноатӣ, воридот ва содироти молҳо, фаъолияти бонкҳо ва низоми қарзиро муҳокима намуданд.Дар фарҷоми мулоқот ҷонибҳо боварӣ изҳор намуданд, ки ҳамкорӣ байни вазорати рушди иқтисод ва савдои Тоҷикистон ва ХБА минбаъд дар самтҳои мухталифи иқтисодиёт рушд хоҳад ёфт.