Мусодираи зиёда аз 3 кг маводи нашъадор

Душанбе, 24.07.2014. (АМИТ «Ховар», Муқаддас Темурзода)- Тавре ки ВКД ҶТ хабар медиҳад, дирӯз дар натиҷаи гузаронидани чорабиниҳои фаврӣ-ҷустуҷӯӣ аз ҷониби кормандони милитсияи Шӯъбаи ВКД дар ноҳияи Б. Ғафуров дар ҳудуди шаҳри Чкалов сокини 29-солаи шаҳри Хуҷанд Шуҳратҷон Юнусов, ҳамчун гумонбар дар даст доштани гардиши ғайриқонунии маводи мухаддир дастгир гардид. Ҳангоми кофтукови шахсӣ аз дохили борхалтаи дастгиршуда маводи нашъадори ҳашиш, ки вазни умумиаш 3 кг 200 граммро ташкил медиҳад, дарёфт ва мусодира шуд.Манбаът ҳамчунин хабар медиҳад, ки, зимни гузаронидани боз як амалиёти махсус кормандони милитсия дар ҳудуди деҳаи Сешанбеи ноҳияи Турсунзода автомашинаи тамғаи “Mersedes-Bens”, ки ба сокини 30-солаи пойтахт Сайёд Табаров тааллуқ дорад, боздошт намуданд. Дар вақти азназаргузаронии автомашинаи мазкур аз зери курсии нишасти мусофир сокини 28-солаи ноҳияи Турсунзода Шарофиддин Зоиров 1 адад пакети селофанӣ, 780 грамм маводи нашъадори бангдона дарёфт ва мусодира шуд.Нисбат ба ҳодисаҳои мазкур парвандаи ҷиноӣ оғоз гардида, тафтиш идома дорад.