Натиҷагирии нимсолаи Вазорати фарҳанг

Душанбе, 18.04.2014. (АМИТ «Ховар», Раъно Нусратуллозода).- Бахшида ба ҷашни 100-солагии оҳангсози маъруфи тоҷик Зиёдулло Шаҳидӣ конфронсҳои илмӣ-назариявӣ дар мактаб-интернати миёнаи махсуси мусиқии ҷумҳуривии ба номи Зиёдулло Шаҳидӣ, озмуни «Истеъдодҳои ҷавон-2014», консерт аз эҷодиёти устод З.Шаҳидӣ дар Коллеҷи санъати ба номи Аҳмад Бобоқулов, маҳфили назариявӣ-эҷодии омӯзгорон ва донишҷӯёни ДДСТ дар Донишкадаи давлатии санъат ба номи Мирзо Турсунзода доир гардиданд, гуфт зимни нишасти матбуотӣ вазири фарҳанги Ҷумҳурии Тоҷикистон Шамсиддин Орумбекзода. Инчунин дар мактаб-интернати миёнаи махсуси мусиқии ҷумҳуривии ба номи Зиёдулло Шаҳидӣ бахшида ба ин ҷашн гӯшаи махсус ташкил карда шудааст.Шамсиддин Орумбекзода зикр намуд, ки дар давраи ҳисоботӣ 13-17 майи соли равон Рӯзҳои фарҳанги Ҷумҳурии Тоҷикистон дар Ҷумҳурии мардумии Чин, 26-30 майи соли ҷорӣ «Рӯзҳои фарҳанги маънавии» Федератсияи Русия дар Ҷумҳурии Тоҷикистон баргузор гардиданд.Инчунин дар нишаст гуфта шуд, ки аз ҷониби МД Иттиҳодияи илмӣ-истеҳсолӣ оид ба муҳофизат ва таъмиру истифодаи ёдгориҳои таърихӣ ва фарҳангӣ дар Қалъаи Ҳисор корҳои барқарорнамоии кӯчаи косибон ва девори мудофиавии асри ХII ба муносибати ҷашни 3000-солагии Ҳисор идома дорад. Мувофиқи «Барномаи давлатии ҳифзи мероси таърихию фарҳангӣ барои солҳои 2012-2020» дар ёдгориҳои мақбараи Ҳоҷаи Заррин, қалъаи Балҷувон, қалъаи Муъминобод, Масҷиди Чилсутун, мақбараи Хоҷа Аюби Ансорӣ, мақбараи Хоҷа Ҳусайни Кангуртӣ корҳои тармиму барқарорнамоӣ идома ёфта истодааст.