Оқибати фоҷиавори сархушӣ

Душанбе, 30.07.2014. (АМИТ «Ховар», Муқаддас Темурзода).- Тавре ки имрӯз ВКД ҶТ иттилоъ медиҳад, бегоҳи рӯзи 26-уми июл дар ҳудуди собиқ бозори масолеҳи сохтмонӣ, воқеъ дар кӯчаи А. Юсуфии ноҳияи Ҳисор ду нафар мардикор, шаҳрванд Шамсулло Алимов соли таваллудаш 1958, сокини ноҳияи Рӯдакӣ ва Раҳмоналӣ Мирзоев, соли таваллудаш 1975, сокини ноҳияи Бохтар дар ҳолати мастӣ байни ҳам ҷангу ҷанҷол намуда ба лату кӯби якдигар мегузаранд. Шамсулло Алимов пас аз мушту лагад, чӯбдасти мехдореро гирифта, ба сару рӯи Раҳмоналӣ Мирзоев якчанд маротиба мезанад, ки дар натиҷа охирон, пагоҳи рӯзи дигар яъне 27-уми июл, ҳангоми ба беморхона бурдан, аз ҷароҳатҳои ҷисмонии бардоштааш дар роҳ ба ҳалокат мерасад.«Дар натиҷаи гузаронидани чорабиниҳои фаврӣ-ҷустуҷӯӣ аз ҷониби кормандони Шӯъбаи ВКД дар ноҳияи Ҳисор шаҳрванд Шамсулло Алимов бо гумони қасдан расонидани зарари вазнин ба саломатӣ дастгир гардид, ки бо кирдори ҷинояткоронаи худ иқрор мебошад. Нисбат ба ҳодисаи мазкур парвандаи ҷиноӣ оғоз гардида, тафтиш идома дорад», — хабар медиҳад сарчашма.