Ошкор гардидании зарари молиявӣ дар ҳаҷми 14 миллион сомонӣ

Душанбе, 31.07.2014.(АМИТ «Ховар», Марзия Саидзода).- «Аз ҷониби Палатаи ҳисоби Ҷумҳурии Тоҷикистон дар нимсолаи соли равон дар вазорату идораҳо, марказҳои идораи барномаҳои инвеститсионӣ, субъектҳои хоҷагидории давлатӣ ва дигар муассисаҳои буҷетӣ 82 санҷишҳои аудиторӣ гузаронида шуд». Ин матлабро Дилмурод Давлатзода -раиси Палатаи ҳисоби Ҷумҳурии Тоҷикистон 31 июл зимни нишасти матбуотӣ дар ҷамъи хабарнигорон дар Душанбе ироа кард. Мавсуф афзуд, зимни гузаронидани чорабиниҳои назоратӣ ва таҳлилию ташхисӣ дар вазорату идораҳо 14 миллион сомонӣ зарари молиявӣ ошкор карда шудааст. Аз он беш аз 1 миллион сомонӣ хароҷотҳои ғайриқонунии пулию молӣ, зиёда аз 2 миллион сомонӣ камомад ва тасарруфи воситаҳои пулию молӣ, 3,5 миллион сомонӣ изофанависӣ дар корҳои таъмиру сохтмонӣ, беш аз 6 миллион сомонӣ маблағи кам ҳисобгардида ва рӯйпуш намудаи андозҳо дар идораю муассисаҳо мебошанд. Ҳамзамон дар ин давра беш аз 1 миллион сомонӣ истифодаи ғайримақсадноки маблағҳои буҷетӣ, 12544,8 ҳазор сомонӣ талафи буҷет аз ҳисоби пардохти беасоси мукофотпулиҳо ба кормандони муассисаҳои буҷетӣ ошкор карда шудааст. Дилмурод Давлатзода афзуд, ки дар ҷараёни санҷишҳои аудиторӣ наздик ба 10 миллион сомонӣ ба фоидаи давлат барқарор карда шудааст, ки ин омор 71,3 % зарари ошкоршударо ташкил медиҳад. Д. Давлатзода ҳамзамон дар ҷараёни нишасти матбуотӣ доир ба сохтор, фаъолит ва нақшаҳои ояндаи ин мақомот гузориш дода, гуфт, ки Палатаи ҳисоб мақоми аудити мустақим буда, аз натиҷаи санҷишҳои гузаронидаи аудиторӣ танҳо ба Президент ва Парлумон маълумот ироа месозад. Бояд тазаккур дод, ки Палатаи ҳисоби Ҷумҳурии Тоҷикистон моҳи декабри соли 2011 бо Фармони Президенти кишвар таъсис дода шуда, он мақоми олии назорати молиявӣ дар ҷумҳурӣ маҳсуб меёбад.