Пешниҳоди нав аз Маркази миллии тестӣ

Душанбе, 4.07.2014. (АМИТ «Ховар», Зарангези Латиф).- Маркази миллии тестии назди Президенти Ҷумҳурии Тоҷикистон ба диққати довталабон мерасонад:Иштирок дар имтиҳонҳои компоненти А ва Б барои тамоми довталабони сабтиномшуда ҳатмист. Новобаста аз он ки довталабон дар имтиҳони компоненти А иштирок кардаанд ё на, ҳузури онҳо дар имтиҳони компоненти Б ҳатмист.Нафароне, ки бо сабабҳои узрнок дар имтиҳони қисми А иштирок карда натавонистанд, ҳатман ба имтиҳони компоненти Б роҳ дода мешаванд. Чун баллҳо дар натиҷаи ҳисобу китоби ҳарду имтиҳон гузошта мешавад.Натиҷаҳои имтиҳонҳои тестӣ тавассути низоми баллҳо арзёбӣ мешавад. Барои субтестҳои фанҳои имтиҳонии қисми А натиҷаи имконпазири ҳадди аксар 200 балл ва барои субтестҳои фанҳои имтиҳонии қисми Б натиҷаи имконпазири ҳадди аксар 300 балл аст. Натиҷаи имконпазири умумии ҳадди аксар барои субтестҳои қисмҳои А ва Б 500 балл мебошад. Инчунин, он довталабоне, ки ба ихстисосҳои самти санъат, дизайн, меъморӣ, динӣ (исломӣ) ва варзиш ҳуҷҷат супоридаанд, дар баробари имтиҳонҳои тестии қисмҳои А ва Б имтиҳони эҷодӣ ва маҳорат (ИЭМ) низ месупоранд.Ҳамин тариқ, вобаста ба натиҷаҳои имтиҳонҳои эҷодию маҳорат ва имтиёзҳои муқарраргардида балли имконпазири умумии ҳадди аксар метавонад зиёд шавад.Калиди ҷавобҳои дурусти китобҳои тестии компоненти А барои кластерҳои 1,2,3,4,5 пас аз анҷоми имтиҳони қисми А барои ҳамаи кластерҳо 6 июл дар сомонаи Марказ ҷой дода мешаванд. Барои компоненти Б мувофиқан пас аз анҷоми имтиҳон 12 июл ҷавобҳо дар сомона ҷой дода мешаванд.Эълони натиҷаҳои имтиҳонҳо тибқи нақша 1 август пешбинӣ гардидааст.