Поймолкунандагони забон ҷарима месупоранд
Душанбе, 30.07.2014. (АМИТ «Ховар», Мавҷуда Анварӣ). — Кумитаи забон ва истилоҳоти назди Ҳукумати ҶТ дар нимсолаи аввали соли 2014 фаъолияти худро баҳри татбиқи Қонуни ҶТ «Дар бораи забони давлатии Ҷумҳурии Тоҷикистон», Барномаи рушди забони давлатӣ барои солҳои 2012-2016, ҳамчунин иҷрои дастуру супоришҳои Президенти ҶТ ва Ҳукумати кишвар ба роҳ мондааст. Санҷиш ва омӯзиши вазъи иҷрои Қонуни ҶТ «Дар бораи забони давлатии ҶТ» мутобиқи Низомнома яке аз самтҳои асосии фаъолияти кумита маҳсуб меёбад.Тибқи иттилои Гавҳар Шарофзода раиси кумитаи мазкур дар нимсолаи аввали соли ҷорӣ аз ҷониби гурӯҳҳои кории санҷишии кумита дар ҳамкорӣ бо намояндагони мақомоту идораҳои дахлдор вазъи иҷрои қонуни мазкур дар иртибот ба номгузорӣ ва лавҳаю овезаҳои 205 ташкилоту муассиса ва марказҳои хизматрасонии маишии ноҳияҳои пойтахт мавриди санҷиш қарор гирифт.Номгузорӣ ва маводи иттилоотии 205 муассиса бар хилофи муқаррароти Қонуни ҶТ «Дар бораи забони давлатии ҶТ» мебошад ва барои бартараф намудани камбудиҳо муҳлат дода шуд. Гавҳар Шарофзода илова кард, ки хушбахтона баъд аз пешниҳоду тавсияҳои кумита ном ва маводи иттилоотии 56 муассиса ба талаботи қонуни мазкур мутобиқ карда шуда, барои риоя накардани қонуни мазкур 15 парвандаи ҳуқуқвайронкунии маъмурӣ баррасӣ гардида, нисбат ба шахсони воқеӣ ва ҳуқуқӣ ҷарима ба маблағи 50 ҳазору 600 сомонӣ таъйин карда шуд.