Рӯҳи Дӯстмурод Алиевро шод намуданд

Душанбе, 18.07.2014.(АМИТ “Ховар”, Марзия Саидзода).-Деҳоти Файзободи ноҳияи Файзобод номи ҳофизи мардумии Тоҷикистон Дӯстмурод Алиевро гирифт. Дар ин хусус 17 июл Маҷлиси миллии Маҷлиси Олии Ҷумҳурии Тоҷикистон доир ба пешниҳоди Ҳукумати Ҷумҳурии Тоҷикистон ва илтимосномаи Маҷлиси вакилони халқи ноҳияи Файзобод қарор марбута қабул кард. Раҳимӣ Фарҳод-раиси Кумитаи палатаи болоии Парлумони Тоҷикистон гуфт, ки ҳадаф аз табдили ном кардани деҳоти Файзободи ноҳияи Файзобод ба номи ҳофизи мардумии Тоҷикистон Дӯстмурод Алиев бартараф намудани такрорёбии номҳо ва пос доштани хотираи неки шахсиятҳои барҷаставу мӯътабари диёр ва ба инобат гирифтани фикри аҳолии ҳамин воҳиди марзиву маъмурист. Шодравон Дӯстмурод Алиев 64 сол муқаддам, аниқтараш 19 апрели соли 1950 дар ноҳияи Файзобод таваллуд шуда, дар аёми авҷи камолоти эҷодияш дунёро падруд гуфт.Шеърҳои сурудаи ин ҳофизи зиндаёд, тараннумгари эҳсосоти латиф ва саршор аз меҳру муҳаббати бузурги инсонӣ буд. Ин аст, ки бо гузашти солҳои тӯлонӣ сурудҳои дилошӯби сароидаи шодравон Дӯстмурод Алиев дар қалби дӯстдорону ҳаводоронаш маъво гирифтааст.