Сабқат аз намуди волейбол дар миёни занон
Хоруғ, 19.07.2014.( АМИТ «Ховар», Файз Мирасан).- Бо ибтикори Раёсати ҷавонон, варзиш ва сайёҳии вилоят, мусобиқаи варзишӣ аз рӯи намуди волейбол миёни дастаҳои занона ҷиҳати дарёфти ҷоизаи устоди варзиш, мураббии шоистаи Ҷумҳурии Тоҷикистон Бекназар Мавлоназаров оғоз гардид. Ин мусобиқа то 21-уми июл идома меёбад ва дар он 7 даста ширкат мекунанд. Хотиррасон мекунем, ки ин мураббии варзида дар рушди риштаи волейбол дар шахри Хоруғ саҳми арзишманд гузошта, ҳоло роҳбарии тими мунтахаби занонаро бар дӯш дорад. Дар давоми 20 соли охир ин тим 12 маротиба дар ҷумҳурӣ мақоми аввалро ишғол карда, шарафи варзишии кишвари моро дар чандин сабқатҳои байналмилалӣ низ ҳифз кардаанд. Бояд гуфт, ки бо мақсади рушди бештари соҳаи варзиш дар чанд соли охир бунёди варзишгоҳҳо ва муассисаҳои варзишӣ дар қаламрави ВМКБ вусъати тоза пайдо намуда, дар се соли охир бо маблағҳои ҳукумати ҷумҳурӣ ва бо ҷалби соҳибкорон дар маркази вилоят ва ноҳияҳои он даҳҳо иншооти варзишӣ мавриди баҳрабардории наврасону ҷавонон қарор дода шудаанд. Бино ба итиллои масъулини Раёсати ҷавонон, варзиш ва сайёҳии вилоят танҳо соли равон дар шаҳру навоҳии вилоят бо кумаки мақомоти маҳаллии ҳокимияти давлатии шаҳру навоҳӣ 15 майдончаҳои варзишӣ ба истифода дода шудаанд ва 22 иншооти варзишӣ дар ҳоли таҷдид қарор доранд.