Санҷишҳо камбудиҳоро ошкор кард

Душанбе, 25.07.2014.(АМИТ «Ховар», Раъно Нусратуллозода).-«Ҷиҳати самаранок ва мақсаднок истифода бурдани маблағҳо дар ташкилоту муассисаҳои буҷетӣ як қатор санҷишҳо гузаронида шудаанд»,- гуфт зимни нишасти матбуотӣ муовини аввали вазири молияи Ҷумҳурии Тоҷикистон Ҷамолиддин Нуралиев. Натиҷаи санҷишҳо нишон дод, ки ба маблағи 12,4 миллион сомонӣ камбудиҳои гуногун аз қабили камомади маблағҳо 848,5 ҳазор сомонӣ, сарватҳои моддию молӣ 1,1 миллион сомонӣ, маблағгузории барзиёди беасос 114,5 ҳазор сомонӣ, нодуруст банақшагирӣ 3,7 миллион сомонӣ, нодуруст ҳиссаҷудокунии андозҳо 1 миллион сомонӣ, изофанавасӣ дар корҳои сохтмонӣ 362,3 ҳазор сомонӣ, зарар аз фурӯш ва иҷрои амволи давлатӣ ба маблағи 107,2 ҳазор сомонӣ ва ғайраҳо ошкор гардиданд. Аз 6 миллион сомонӣ маблағҳои ошкоршуда 5 миллион сомонӣ ба буҷет ва 1 миллион сомонӣ ба корхонаҳо барқарор карда шуданд.