Шаҳринав: Оё «Барнома»… иҷро мешавад?

Шаҳринав, 24.07.2014.(АМИТ «Ховар», Ҳотами Шариф).- То имрӯз бештар аз 4 ҳазору 610 адад лампаҳои камасрафи корношоямшуда аз аҳолӣ ҷамъ оварда, дар ҷамоатҳои шаҳраку деҳот ва муассисаҳои коммуналӣ безарар гардонида шуд, иттилоъ доданд ба хабарнигорон дар ҷараёни нишасти матбуотӣ, ки дар мақомоти иҷроияи ҳокимияти давлатии ноҳияи Шаҳринав баргузор гардид. Раиси ноҳия Исматулло Зайдов дар бораи натиҷаҳои меҳнатӣ барои нимсолаи аввал маълумоти муфассал дод. Зимни суханронии раис қайд гардид, ки кишоварзони ноҳия барои рӯёнидани ҳосили фаровони маҳсулотҳои кишоварзӣ саъю талоши беандоза доранд. Ҳаҷми умумии маҳсулоти саноатӣ дар корхонаҳои ноҳия ба 56 миллиону 702 ҳазору 590 сомонӣ расид. Дар асоси «Барномаи рушди иҷтимоию иқтисодии ноҳияи Шаҳринав дар давраи солҳои 2007-2015», ки бо Қарори Ҳукумати Ҷумҳурии Тоҷикистон тасдиқ гардидааст барои сохтмони биноҳои шуъбаи ВКД, маркази ҷавонон, варзиш ва сайёҳӣ, прокуратураи ноҳия, қасри фарҳанг бо китобхонаи бачагона замин ҷудо гардида сохтмони онҳо дар ҳоли идома қарор доранд. То ин дам дар асоси барномаи мазкур як қатор биноҳои маъмурӣ ба истифода дода шуданд.