Шароити хуби табобатӣ барои шахсони маъюб

Душанбе, 9.07.2014. (АМИТ «Ховар», Мавҷуда Анварӣ). — Дар рӯзи таҷлили иди маъюбон бо дастгирии Ҳукумати кишвар аз тарафи Вазорати тандурустӣ ва ҳифзи иҷтимоии аҳолӣ дармонгоҳи Хадамоти давлатии ташхиси тиббию иҷтимоӣ ба фаъолият оғоз намуд. Дармонгоҳ дар саҳни Маркази миллии тиббӣ ҷойгир буда, дар он тамоми шароити ташхисию табобатӣ барои шахсони имконияташон маҳдуд пешбинӣ шудааст. Ҳуҷраҳои дандонпизишкӣ, ташхиси тамоми узвҳои дарунӣ бо дастгоҳҳои муосири тиббӣ ҷиҳозонида шудаанд. Дар ҳуҷраи ташхиси гӯшу гулӯ ва бинӣ тавассути дастгоҳи муосир метавон дар як вақт ҳам ташхису ҳам табобат ва ҳатто ҷарроҳиҳоро бо сифати баланд анҷом дод. Дастгоҳҳои ултрасадо ва доплерӣ, ташхиси колпоскопӣ ва сабти барқии дил, озмоишгоҳи ташхисии муосир метавонанд сари вақт ва бо сифати баланд бемориҳоро муайян намоянд.Ба ин дармонгоҳ шахсони дорои имкониятҳои маҳдуд аз тамоми ҷумҳурӣ метавонанд муроҷиат намоянд.