Шартномаи мураббиёни тоҷик ба ФФА

Душанбе, 23.07.2014. (АМИТ «Ховар», Ситораи Боймурод).- Ҳафт мураббии риштаи футболи тоҷик , ки муҷаввизи дараҷаи «А»-и Конфедератсиони футболи Осиёро доранд, ба Кобул барои раҳбарӣ ба бошгоҳҳои футболи Афғонистон мераванд.Тавре ки дар ин бора ба сомонаи Федератсиони футболи Тоҷикистон Муҳаммад Юсуф Коргар, муовини раиси Федератсиони футболи Афғонистон хабар додаст, мураббиёни тоҷик бо ин Федератсия шартнома ба имзо расидаанд.Мутахассисони тоҷик ба дастаҳои Афғонистон дар мавриди баргузории мусобиқаи қаҳрамонии ин кишвар, ки моҳи сентябр шурӯъ мешавад, раҳбарӣ мекунанд.Ба иттилои манбаъ, бираббиён Боирҷон Эгамбердиев, муовини мудири техникии ФФТ оид ба маълумоти мураббигӣ, Аҳлиддин Турдиев, собиқ сармураббии дастаи «Далерон»-и Истаравшан, Тоҳирҷон Муъминов, сармураббии «Вахш»-и Қӯрғонтеппа, Ғайраталӣ Мираҳмадов, собиқ сармураббии «Равшан»-и Кӯлоб, Валиҷон Эгамбердиев, мураббии Мактаби ҷумҳуриявии маҳорати олии варзишӣ оид ба футбол, Наҷмиддин Толибов, собиқ сармураббии «Регар-ТадАЗ»-и Турсунзода ва Ҳасан Раҷабов, собиқ менеҷери мунтахаби миллии Тоҷикистон ҷиҳати фаъолияти минбаъда, ба Кобул сафар хоҳанд кард. Ба онҳо боз як мутахассис — Усмон Тошев аз Узбакистон, ки мушовири ФИФА ва АФК мебошад, ҳамроҳ мешавад.Ба гуфтаи Муҳаммад Юсуф Коргар, мутахассисони Тоҷикистон ва Узбакистон нимаи моҳи август озими Кобул мешаванд ва бо дастаҳои худ давраи омодагиро ба мусобиқаи қаҳрамонии Афғонистон анҷом медиҳанд. Ба кадом дастаҳо раҳбарӣ кардани онҳо баъди ба Кобул омаданашон маълум хоҳад шуд.