Соҳаи тиб бо техникаи муосир ба муваффақият ноил мегардад

Душанбе, 9.07.2014. (АМИТ «Ховар», Мавҷуда Анварӣ). — Дар нишасти матбуотие, ки имрӯз дар вазорати тандурустӣ ва ҳифзи иҷтимоии аҳолӣ бо иштироки роҳбарияти ин ниҳод баргузор гардид, вазири тандурустӣ ва ҳифзи иҷтимоии аҳолӣ Нусратулло Салимзода оид ба дастовардҳои илми муосир ва технологияи ҳозиразамон, ба роҳ мондани усулҳои нави пешгирӣ, ташхис ва табобат, бо мақсади фароҳам намудани инфрасохтори мусоиди соҳаи тандурустӣ ва беҳтар намудани дастрасии аҳолӣ ба хизматрасонии босифат ва саривақтӣ дар шашмоҳаи аввали соли ҷорӣ мухтасар иттилоъ дод.Н. Салимзода гуфт, ки вазорат дар самти таъмин ва воридсозии техникаи муосири ташхисию табобатӣ ба муваффақияти назаррас ноил гаштааст. Айни ҳол дар кишвар бо дарназардошти рушди тибби хусусӣ 6 адад томографи компютерӣ, 8 адад тамографи магнитию резонансӣ, 4 адад ангиграф, 3 маммограф, 7 адад дастгоҳи эндовидеоҷарроҳӣ, 2 эхокардиограф, 2 дастгоҳи поксозии хун фаъолият доранд.