Боздиди кории М.Ҷабборӣ аз ноҳияи Ёвон

Душанбе, 13,08,2014 (АМИТ «Ховар»).- Санаи 13 августи соли ҷорӣ боздиди кории муовини Сарвазири Ҷумҳурии Тоҷикистон Марҳабо Ҷабборӣ ба ноҳияи Ёвони вилояти Хатлон анҷом дода шуд.Зимни сафар муовини Сарвазири мамлакат аз муассисаҳои соҳаҳои иҷтимоии ноҳия дидан карда, бо кормандони соҳаҳои тандурустӣ, маориф, варзишгарон, занон ва ҷавонон мулоқотҳо доир намуд, ки дар онҳо, аз ҷумла оид ба вусъат бахшидани корҳои ободонӣ, омодагии пурра ба мавсими нави соли хониш, баланд бардоштани сифати таълиму тарбия, беҳтарсозии сатҳи хизматрасонии тиббӣ, тайёрии ҳамаҷониба ба зимистонгузаронӣ, инчунин рафъи камбудиҳои ҷойдошта дар ҷомеа ва паст кардани тамоюли зуҳуроти номатлуб, таъкидҳо ва супоришҳои мушаххас баён гардиданд.Ҳамзамон, муовини Сарвазири Ҷумҳурии Тоҷикистон дар ҷараёни сафари кории худ дар хоҷагии деҳқонии “Руқия”-и ҷамоати деҳоти Гулсара Юсупова бо фаъолзанон дар масъалаҳои мубрами рӯз сӯҳбати озод доир намуд.Сафари кории Марҳабо Ҷабборӣ дар ноҳияҳои Хуросон ва Абдураҳмони Ҷомии вилояти Хатлон дар назар аст.