Бунёди манораи 36-метра дар Душанбе

Душанбе, 7.08.2014. (АМИТ «Ховар», Мавҷуда Анварӣ).- «Моҳи октябри соли равон мутахассисони фаронсавӣ ба бунёди манораи баландиаш 36-метра оғоз хоҳанд кард»-, иброз намуд директори генералии КВД «Тоҷикаэронавигатсия» Анвар Мақсудов зимни нишасти матбуотӣ. Ин манора аз ҷониби Вазорати мудофиаи Фаронса маблағгузорӣ мешавад. Дар он лифт насб шуда, манора барои беҳтар идора кардани ҳавопаймоҳо мусоидат хоҳад кард. Баландии манораи кунунии вокзал 16 метр аст. Анвар Мақсудов илова намуд, ки дар шаш моҳи соли ҷорӣ КВД «Тоҷикаэронавигатсия» ба 190 ширкати ҳавопаймоии ватаниву хориҷӣ хизмат пешниҳод намуд. Таҳлилҳо нишон дод, ки ширкатҳои авиатсионӣ барои иҷрои парвозҳо ба аэродромҳои кишварамон аз 130 навъ киштиҳои ҳавопаймоӣ истифода мебаранд.Тибқи иттилои директори генералии КВД «Тоҷикаэронавигатсия»тайи нимсолаи аввали соли ҷорӣ даромади умумии муассиса нисбат ба ҳамин давраи соли гузашта 18% зиёд гашт. Муассиса дар ин давра ба буҷаи давлат зиёда аз 8 миллион сомонӣ пардохт намуд.