Дар Хуҷанд 153 оила соҳиби қитъаи замин шуд

Хуҷанд, 18.08.2014. (АМИТ «Ховар», Абдуаҳад  Шарифзода ). –  Дар   маҳаллаҳои нави 14 ва  15 – уми  шаҳри  Хуҷанди  вилояти  Суғд  153  оила  соҳиби   қитъаҳои  замин  гардид.
Тавре  ки  аз  маъмурияти   шаҳри  Хуҷанд  хабар  доданд,   оилаҳои  зикршуда   мувофиқи  навбат  барои  беҳдошти  шароити  манзилиашон  6  сотихӣ  замин  гирифтанд.
Дар  маросими тақсими  қитъаҳои  замин  раиси  вилояти  Суғд  Абдураҳмон  Қодирӣ  ва  раиси  шаҳри  Хуҷанд  Раҷаббой  Аҳмадзода ширкат  доштанд.
Масоҳати  умумии  ду  маҳаллаи  нав  96,58  гектарро  ташкил  дода, аз  ҷумлаи он 600 метри  мураббаъ  барои  сохтмони хонаҳои  истиқоматӣ, 11  гектар  барои  ободонии  кӯчаю  роҳҳо  ва  19,5  гектар барои  бунёди  боғу  хиёбонҳо тахсис  ёфтааст. 
Имрӯз 22  нафар  корманди  соҳаи тиб ба  ифтихори  иди  касбӣ   барои дарёфти  қитъаҳои  замин  сертификат  гирифт.