Дастгир шудани Ҳумайнӣ-узви равияи салафия

Душанбе, 18.08.2014. (АМИТ «Ховар», Муқаддас Темурзода).-Зимни гузаронидани чорабиниҳои фаврӣ-ҷустуҷӯӣ аз ҷониби кормандони мақомоти корҳои дохилӣ сокини 25-солаи пойтахт Ҳумайнӣ Ғозиев, ҳамчун гумонбар барои даъвати оммавӣ ҷиҳати бо роҳи зӯроварӣ тағйир додани сохти конститутсионӣ дастгир гардид. Тибқи иттилои ВКД ҶТ, ӯ дар давоми соли 2009 аз шаҳрванд Баҳром Олимов таълимоти динии равияи салафияро омӯхта, аз ҳамон вақт то моҳи августи соли 2014 ҳамчун узви равияи динии салафия фаъолият кардааст.
Дар ҳудуди шаҳри Душанбе, дар масҷиди ҷомеи марказии пойтахт ба номи Ҳоҷӣ Яъқуб ва дар маъракаву маросимҳои мардум ба фаъолияти ҳизбҳои сиёсӣ, иттиҳодияҳои ҷамъиятӣ ва динӣ машғул шуда, шаҳрвандон, Наҷмиддин Ашӯров, соли таваллудаш 1989, Аҳмад Зоиров, соли таваллудаш 1986, Фирӯз Сатторов, соли таваллудаш 1990, Намозиддин Шамсиддинов, соли таваллудаш 1974, истиқоматкунандагони шаҳри Душанбе ва дигаронро ба ин равия ҷалб намудааст. 
Нисбат ба ҳодисаи мазкур парвандаи ҷиноӣ оғоз гардида, тафтиш давом дорад.