Дастовардҳои назарраси мактабиёни ноҳияи Б. Ғафуров

Душанбе, 28.08.2014. (АМИТ «Ховар», Раъно Нусратуллозода).-Соли ҷорӣ 75 нафар хонандаи муассисаҳои таҳсилоти миёнаи умумии ноҳияи Бобоҷон Ғафуров дар озмунҳои вилоятӣ ширкат намуда, 52 нафар хонанда ба гирифтани ҷойҳои якум, дуюм ва сеюм сарфароз гардид, ки дар натиҷа мақоми аввал насиби хонандагони ин ноҳия шуд. Тибқи иттилои Хадамоти матбуоти раиси вилояти Суғд, толибилмони ноҳия дар озмуни фаннии ҷумҳуриявӣ низ ширкат варзида, 20 нафар сазовори ҷойҳои аввал, дуюм ва сеюм гардид.
Инчунин 75 нафар аз ноҳияи мазкур дар озмуни фаннии Академияи хурди илмҳои Ҷумҳурии Тоҷикистон ширкат варзида, сазовори ҷойҳои ифтихорӣ гардид.
Мутобиқи натиҷаи озмуни фаннии Академияи хурди илмҳои Ҷумҳурии Тоҷикистон аз рӯйи нишондоди даставӣ хонандагони ноҳияи Бобоҷон Ғафуров соли ҷорӣ дар ҷумҳурӣ мақоми аввалро касб намуданд.
Мавриди зикр аст, ки аз ноҳияи Бобоҷон Ғафуров ҳамчунин 6 нафар дар озмуни байналмилалӣ ширкат намуда, ба гирифтани медали нуқра сазовор гардид.