Фестивал — бозиҳои варзишӣ дар Хоруғ
Хоруғ, 19.08.2014.(АМИТ «Ховар», Файз Мирасан).- Дар арафаи 23-юмин солгарди Рӯзи истиқлолияти Ҷумҳурии Тоҷикистон аз 10-ум то 25-уми августи соли 2014 дар шаҳри Хоруғ фестивали бозиҳои варзишӣ бо иштироки тимҳои мунтахаби ВМКБ, вилоятҳои Хатлон ва Суғд, нохияхои тобеи марказ баргузор мегардад.
Ҳамасола аз тарафи раёсати ҷавонон, варзиш ва сайёҳии вилоят дар маркази вилоят бозиҳои варзишӣ доир мегарданд.
Имсол ин бозиҳо аз 7 намуд бо шумули баскетбол, волейбол, футболи хурд, тенниси рӯи миз, варзиши сабук, гӯштини тарзи озод ва дзюдо иборат буда, сабқати дзюдо дар ноҳияи Рӯшон ва дигар намудҳо дар шаҳри Хоруғ баргузор мегарданд.
Футболбозони тимҳои Хоруғ-1 ва ноҳияи Қумсангир дар майдончаи варзишии мактаби рақами 2-и шаҳри Хоруғ бо ҳам рақобат намуданд. Тими ноҳияи Роштқалъа ва варзишгарони собиқадор аз шаҳри Хоруғ низ дар ҳамин майдонча бо ҳам вохӯрӣ анҷом доданд.
Тими Хоруғ-1 бо бартарии 6 бар 5 ҳамтоёни худро аз ноҳияи Қумсангир шикаст дод. Тими собиқадорони шаҳри Хоруғ дар ин сабқат маҳорату малакаи хуб нишон дода, рақибонашонро аз ноҳияи Роштқалъа бо ҳисоби 6 бар 3 шикаст дода, мақоми худро дар ҷадвали мусобиқа мустаҳкам намуд.