Идомаи бозиҳои наврасон дар Нанҷинг

Душанбе, 20.08.2014. (АМИТ “Ховар”, Ситораи Боймурод).- Баъди натиҷагирии се рӯзи мусобиқот аз рӯи барномаи Бозиҳои II тобистонаи олимпии наврасон дар Нанҷинг дар ҳисоби умумидаставӣ дастаи мунтахаби Чин бо 6 медали тилло, 1 нуқра ва 6 биринҷӣ дар мақоми аввал аст. 
Тавре ки дар ин бора Кумитаи миллии олимпии кишвар хабар додааст, дастаи мунтахаби Русия бо 5 медали тилло, 5 нуқра ва 3 биринҷӣ дар ҷойи дувум ва тими мунтахаби Италия бо 4 медали тилло, 3 нуқра ва 1 биринҷӣ дар ҷойи севум қарор дорад. Тими мунтахаби Маҷористон (4-0-3) дар зинаи чорум, Бритониёи Кабир (3-2-2) дар зинаи панҷум ва Иёлоти Муттаҳидаи Амрико (3-1-2) дар зинаи шашум ҷойгир шудааст.
Аз рӯи ҳисоби умумии медалҳо Чин ва Русия, ки 13-медалӣ доранд,  пешсаф мебошанд. Итолиёвиҳо бо 8 медал дар ҷойи севуманд.
Дар рӯзи севуми мусобиқот — 19-уми август  варзишгарони навраси тоҷик аз рақобатҳо озод буданд. Имрӯз, 20-уми август Меҳрангез Назарова дар давидан ба масофаи 3000 метр байни духтарон вориди рақобат мешавад.
Ёдовар мешавем, ки ба ҳайати дастаи мунтахаби Тоҷикистон дар Бозиҳои дувуми тобистонаи олимпии наврасон 8 варзишгар дар 7 намуд — гӯштини озод, гӯштини юнониву румӣ, варзиши сабук, дзюдо, камонварӣ, тирандозӣ ва шиноварӣ  дохиланд.