Интихоби лоиҳаҳои афзалиятнок

 
Душанбе, 28.08.2014. (АМИТ «Ховар», Бекназари Абӯбакр). — То санаи 1 августи соли 2014 ба Муассисаи давлатии “Фонди дастгирии соҳибкорӣ” бештар аз 123 лоиҳаи тиҷоратии субъектҳои соҳибкорӣ ворид гардидааст. Аз ҷумла ба шаҳри Душанбе 5 адад, вилояти Суғд — 23, вилояти Хатлон — 5, ВМКБ — 19 ва ноҳияҳои тобеи ҷумҳурӣ 25 адад рост меояд. Дар ин бора чанде қабл дар ҷаласаи навбатии Шӯрои нозирони Муассисаи давлатии «Фонди дастгирии соҳибкорӣ» иттилоъ дода шуд. 
Аз Кумитаи давлатии сармоягузорӣ ва идораи амволи давлатӣ ба АМИТ «Ховар» иттилоъ доданд, ки бо назардошти имкониятҳои молиявии Муассисаи давлатии «Фонди дастгирии соҳибкорӣ» ва ба талаботҳои қарзгирӣ ҷавобгӯ будани якчанд лоиҳа дар ҷаласаи Шӯро 18 лоиҳаи аз нигоҳи иқтисодӣ афзалиятнок, ки аз ҷониби мутахассисони Муассисаи давлатии «Фонди дастгирии соҳибкорӣ» ва Бонки давлатии амонатгузории Ҷумҳурии Тоҷикистон “Амонатбонк” мавриди омӯзиш ва баҳогузорӣ қарор дода шудаанд, мавриди баррасӣ қарор гирифт.
Аз ин шумораи лоиҳаҳои пешниҳодгардида тибқи овоздиҳӣ 9 дархости субъектҳои соҳибкорӣ оид ба ҷудо намудани маблағҳои қарзӣ барои амалӣ намудани нақшаҳои тиҷоратӣ, ки аз нигоҳи иқтисодӣ афзалиятнок буданд, бо ҷудо намудани 3,740 ҳазор сомонӣ  маблағи қарзӣ аз ҳисоби Фонд дасгирӣ гардид.