Конибодом: омӯзиши қоидаҳои муҳоҷирати бехатар

Душанбе, 27.08.2014. (АМИТ «Ховар», Лайло Тоирӣ).-    Дар асоси нақшаи ҳамкории муштараки Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд ва ташкилоти ҷамъиятии «Марказ оид ба ҳуқуқҳои инсон» 25 августи соли 2014 дар шаҳри Конибодом   корҳои фаҳмондадиҳӣ гузаронида шуданд. Барои дар сатҳи баланд ба роҳ мондани корҳои фаҳмондадиҳӣ дар радифи намояндагони Раёсат ва ТҶ «Марказ оид ба ҳуқуқҳои инсон», намояндагони мақомоти иҷроияи маҳаллии ҳокимияти давлатӣ, аз ҷумла раисони ҷамоатҳои деҳот ва кумитаҳои маҳаллаҳо мусоидат намуданд.
Дар чорабиниҳо, пеш аз ҳама, қоидаҳои муҳоҷирати бехатар, моҳияти тағйироту иловаҳо ба қонунгузории Федератсияи Русия вобаста ба муҳоҷират ва аҳамияти гирифтани полиси суғуртавӣ ба шаҳрвандон фаҳмонида шуданд.
Тавре ки аз шуъбаи муносибатҳои байналмилалӣ, робита бо ҷомеа ва ҳамватанони бурунмарзии Хадамоти муҳоҷират  иттилоъ доданд, дар вохӯрии мазкур зиёда аз 70 нафар фаъоли шаҳри Конибодом иштирок намуд.