Коркарди нуқра, мис ва маъданҳои Тоҷикистон

Душанбе, 1.08.2014. (АМИТ «Ховар», Мавҷуда Анварӣ). — Дар мулоқоти Президенти кишвар Эмомалӣ Раҳмон ва Роҳбари ширкати Гленкоае АГ-и корпоратсияи фаромиллии Гленкор аз давлатҳои Швейтсария ва Инглистон Эндрю Каплан масоили ҳамкорӣ барои истеҳсоли алюминии аввалия, коркарди минбаъдаи саноатӣ, тиҷорати байналмилалии он ва дар соҳаи саноати кӯҳкорӣ мавриди баррасӣ қарор гирифт.Пас аз анҷоми мулоқот Роҳбари ширкати Гленкоае АГ-и корпоратсияи фаромиллии Гленкор аз давлатҳои Швейтсария ва Инглистон Эндрю Каплан дар ҳузури хабарнигорон чунин иброз намуд: «Аз ҷониби ширкати Гленкоае ташаккур мекунем, ки моро ба ин сарзамин даъват карданд. Ширкати Гленкоае дар солҳои қаблӣ бо «Ширкати Талко» ва “Ширкати алюминийи Тоҷик” робитаи бисёр наздик дошт ва шарики қадимии иқтисодии давлати Тоҷикистон аст. Мақсади ба ин ҷо ташриф овардани мо ҳам вусъат додани робитаҳои ҳамкорӣ мебошад. Далели аслие, ки мо инҷо омадем, афзоиш додани иқтидори истеҳсоли алюминий арзёбӣ мешавад. Он зарфиятҳоеро ки алъон ин ширкатҳо истеҳсол намекунанд, дубора барқарор намоем. Мо тасмим дорем, ки ҳамкориҳоро на танҳо дар соҳаи алюминий, балки дар истихроҷу коркарди захираҳои фаровони нуқра, мис ва дигар маъданҳои Тоҷикистон пурзӯр намоем.Мо ҳамчунин азм дорем, ки иштирокдори фаъоли тендери байналмилалӣ барои кор дар Кони Мансур бошем».