Лағви 7 қарор дар бораи ихроҷи шаҳрвандони ҶТ аз ФР

 Душанбе, 18.08.2014. (АМИТ «Ховар», Лайло  Тоирӣ). – Суди   шаҳри  Маскав қарори суди  ноҳияи  Нагатиноро  дар  бораи  ҷаримаи  маъмурӣ  дар  ҳаҷми  5  ҳазор  рубл  ва  ихроҷи  шаҳрванди  Тоҷикистон  аз  Федератсияи  Русия  бекор  кард. 
Тавре  ки   сухангӯи намояндагии Хадамоти  муҳоҷирати ҶТ  дар  ФР  Иброҳим  Аҳмадов   хабар  дод, сокини  шаҳри  Душанбе Давлат  Сафаров  дар  бораи  беасос  будани  қарори  дахлдори  суди  ноҳияи  зикршуда  ба  хадамоти  муҳоҷирати  ҶТ  дар  ФР  муроҷиат  намуд. 
Мувофиқи  қарори  суд   номбурда  тибқи  моддаи  18.8 Кодекси  ҷиноятии  Федератсияи  Русия, ки  халалдор  намудани  қоидаҳои  сукунатро пешбинӣ  мекунад,  айбдор  дониста  шуда буд. 
Намояндагӣ баъди  муфассал  омӯхтани  ин  қазия  ба  суди  шаҳри  Маскав   шикоятнома  ирсол  дошт,  ки дар  асоси  он  қарори суди   ноҳияи Нагатино  бекор  карда шуд.
Тайи  моҳҳои  июл ва  августи  соли  ҷорӣ  бо  мусоидати  ҳуқуқшиносони  намояндагӣ  7  қарори  судҳои  ноҳиявии  мақомоти  судӣ  лағв  гардид.