«Мақолаи беҳтарин» қадрдонӣ мешавад
Душанбе, 8.08.2014. (АМИТ «Ховар», Мавҷуда Анварӣ).- 19 сентябри соли ҷорӣ ба ифтихори Рӯзи забони давлатии Ҷумҳурии Тоҷикистон (5 октябр) дар Кумитаи забон ва истилоҳоти назди Ҳукумати ҶТ Конфронси ҷумҳуриявии илмӣ таҳти унвони «Забони давлатӣ ва рушди истилоҳот» баргузор мегардад. Кумитаи забон ва истилоҳот дар робита ба ин аз 8-уми июл то 3-юми сентябр озмуни «Мақолаи беҳтарин»-ро эълон менамояд. Таҳлили воқеии вазъи истилоҳоти забони илми муосир, пешниҳоди истилоҳоти дақиқ ба забони давлатӣ дар самтҳои мухталиф, таҳлил ва баррасии мушкилоти истилоҳшиносӣ ва истилоҳнигорӣ, баррасии мушкилоти фарҳангнигорӣ дар замони муосир, мусоидат ба густариши забони давлатӣ ҳамчун забони илм шартҳои озмун мебошад. Дар озмун истилоҳшиносону донишмандон дар маҷмӯъ кулли зиёиёни кишвар имкони иштирок карданро доранд. Мақсад аз эълони озмун ҷалби бештари олимон ба таҳлили воқеии вазъи истилоҳоти забони илми муосир ва баланд бардоштани нуфузу эътибори забони давлатӣ мебошад.Аз иштирокчиён хоҳиш мекунем, ки мақолаҳои худро ба нишонии кӯчаи Беҳзод 25, ошёнаи сеюми бинои Муассисаи давлатии «Тоҷикфилм» ё почтаи электронии Кумита: kumitaizabon@mail.ru пешниҳод намоянд. Ба мақолаҳои беҳтарин барои ҷойи якум 1500 сомонӣ, ҷойи дуюм 1000 сомонӣ ва ҷойи сеюм 500 сомонӣ мукофотпулӣ муқаррар шудааст.