Мақоми гурезаҳо дар Ҷумҳурии Тоҷикистон

Душанбе, 22.08.2014. (АМИТ «Ховар», Мавҷуда Анварӣ).- Ҳафтаи ҷорӣ кормандони раёсати Хадамоти муҳоҷирати Вазорати меҳнат, муҳоҷират ва шуғли аҳолӣ бо Ташкилоти ҷамъиятии байналхалқии «Ҳуқуқ ва Беҳбудӣ» дар «Кохи матбуот» — и шаҳри Хуҷанд дар мавзӯи «Мақоми ҳуқуқии гурезаҳо ва қоидаҳои будубоши онҳо дар Ҷумҳурии Тоҷикистон» бо иштироки намояндагони ташкилоти мазкур ва намояндаи раёсати комиссари Олии СММ оид ба гурезаҳо дар Ҷумҳурии Тоҷикистон машварат доир намуданд.Бояд зикр намуд, ки гурезаҳо аз ҷониби Хадамоти шиносномадиҳиву бақайдгирии Вазорати корҳои дохилӣ ба қайд гирифта шуда, аз ҷониби Комиссияи байни вазоратҳо ба онҳо мақоми гуреза дода мешавад.Ҳуқуқи гурезаҳо тибқи қонуни Ҷумҳурии Тоҷикистон «Дар бораи гурезаҳо» ва қоидаи будубоши онҳоро Қарори Ҳукумати Ҷумҳурии Тоҷикистон «Дар бораи тасдиқ намудани қоидаҳои иқомати шаҳрвандони хориҷӣ дар Ҷумҳурии Тоҷикистон» муайян менамояд.