Машварати кормандони соҳаи маориф

  Душанбе, 20.08.2014. (АМИТ «Ховар», Раъно Нусратуллозода).-Имрӯз дар мактаби таҳсилоти миёнаи умумии №3-и шаҳри Чкалов машварати августии кормандони соҳаи маорифи шаҳр оғоз гардид. 
Дар машварат сарварони мактабҳо, роҳбарони кӯдакистонҳо, омӯзгорону мурабияҳо ва шахсони масъули соҳаи маорифи шаҳр ҳузур доштанд. Мудири шуъбаи маорифи шаҳр Муҳаббат Ҳомидова зикр намуд, ки машғулиятҳои сексионӣ аз фанҳои пешбинишуда дар таълимгоҳи мазкур таи 2 рӯз гузаронида шуда, машварати ҷамъбастӣ 25 август доир хоҳад шуд.
Дар ҷамъомад зикр  гардид, ки дар пеш ҷашнҳои бузурги миллӣ, аз ҷумла 23-солагии Истиқлолият, 20-солагии Конститутсия (Сарқонун)-и Ҷумҳурии Тоҷикистон ва дигар маъракаҳои муҳим қарор доранд ва маорифчиён дар қатори аҳолии шаҳр бояд  ин санаҳои муҳимро бо омодагии ҳамаҷониба истиқбол намоянд.
Дар ин бора аз мақомоти иҷроияи ҳокимияти давлатии шаҳри Чкалов хабар доданд.