Муҳокимаи натиҷаи ҳамкорӣ

Душанбе, 28.08.2014. (АМИТ «Ховар», Муқаддас  Темурзода). – Муовини  аввали  вазири  мудофиаи  Ҷумҳурии  Тоҷикистон,  сардори  Ситоди генералии  Қувваҳои  мусаллаҳи  кишвар Зариф  Шарифзода  дар   машварати  сардорони  ситодҳои  генералии  давлатҳои  аъзои Созмони  ҳамкории  Шанхай, ки  имрӯз, 28  август, дар  шаҳри  Пекини  Ҷумҳурии  Мардумии  Чин  оғоз  меёбад, иштирок  мекунад. 
Тавре  ки  аз Вазорати  мудофиаи  ҶТ хабар  доданд,  иштирокдорони  машварат  натиҷаи  ҳамкориҳои соли гузаштаро муҳокима  ва  масоили рушди  минбаъдаи  ҳамкории  байни  Қувваҳои  мусаллаҳи  давлатҳои  аъзои  СҲШ – ро  баррасӣ  намуда, перомуни  масоили  мубрами  амнияти байналмилалию  минтақавӣ  табодули  афкор  мекунанд. 
Сардорони  ситодҳои  генералии  вазоратҳои  мудофиаи  давлатҳои  аъзои  СҲШ – ро  раиси Ҷумҳурии  Мардумии  Чин Си Сзинпин ба  ҳузур  мепазирад. 29  август  сардорони ситодҳои генералии  давлатҳои  СҲШ дар  марҳалаи  хотимавии  машқҳои  зиддитеррористии  ҳарбии  «Иқдоми  сулҳомез – 2014» ширкат  мекунанд.
Ёдовар  мешавем, ки  машқҳои зиддитеррористӣ  аз  9  то 30  августи соли  ҷорӣ дар  ҶМЧ идома  ёфта,  дар онҳо 200 нафар хидматчиёни  ҳарбии  кишвари  мо  низ  иштирок  доранд.
Роҳбарии ҳайати Тоҷикистонро  дар  машқҳои  зикршуда  муовини  аввали  сардори  Ситоди  генералии  Қувваҳои  мусаллаҳи  Тоҷикистон  Тоҳир  Хайруллоев ба  уҳда дорад.