Мулоқоти Қодири Қосим бо Аббосалӣ Ҳасанов

Душанбе, 5 .08.2014 (АМИТ «Ховар», Марҳабои Азамат) – Соли 2014 баргузории бизнес форум бо иштироки соҳибкорони тоҷику озарӣ, ташкили намоишгоҳи молҳои саноатии Озарбойҷон, ҳамчунин ҷаласаи сеюми Комиссияи байниҳукуматӣ оид ба ҳамкориҳои тиҷоратию иқтисодӣ ва илмию фарҳангӣ миёни Ҷумҳуриҳои Озарбойҷон ва Тоҷикистон ба нақша гирифта шудааст. Дар ин бора зимни мулоқоти Сафири фавқулодда ва мухтори Ҷумҳурии Озарбойҷон дар Тоҷикистон Аббосалӣ Ҳасанов бо раиси Кумитаи давлатии сармоягузорӣ ва амволи давлатии Тоҷикистон Қодири Қосим иттилоъ дода шуд. Зимни вохӯрӣ А.Ҳасанов ва Қодири Қосим ҳамчунин масоили сохтмони роҳи оҳани Туркманистон-Афғонистон- Тоҷикистонро муҳокима намуданд.Махсусан, роҳбари кумита зикр намуд, ки ҷониби Туркманистон аллакай сохтани қитъаашро ба итмом расонид ва Бонки ҷаҳонӣ маблағгузории сохтмони қитъаи роҳи оҳани Афғонистонро ба ӯҳда гирифтааст.Хамсӯҳбатон ҳамчунин дар бораи ҳамкорӣ дар соҳаи геология мубодилаи афкор намуданд.