Мулоқоти Ш.Саид бо намояндагони DONGFANG ELEKTRIC

Душанбе, 25.08.2014. (АМИТ «Ховар», Лайло  Тоирӣ). – Чанде  пеш  раиси Палатаи  савдо  ва  саноати  ҶТ  Шариф  Саид бо  намояндагони  ширкати байналхалқии энергетикии DONGFANG ELEKTRIC (ҶМЧ) бо  роҳбарии  муовини  директори  генералии  ширкат Куа  Юотжи  мулоқот  анҷом  дод.
Мусоҳибон  дар  ҷараёни  мулоқот  вазъу  дурнамои   ҳамкории  дуҷониба дар  бахши  энергетикаро  мавриди  муҳокима  қарор  доданд.
Тавре  ки дар  Палатаи  савдо  ва  саноати  ҶТ  қайд  намуданд,  зимни  мулоқот  аз  рушди  муваффақонаи  муносибатҳои  дӯстонаи байни Тоҷикистону  Чин  дар  бахшҳои сиёсат,  иқтисодиёт,  энергетика,  нақлиёт  ва  бисёр  соҳаҳои  дигар  изҳори  қаноатмандӣ  карда шуд.
Куа Юотжи зимни  суханрониаш  чунин  гуфт: «Мо  умедворем, ки  кишварҳоямон  бо  саъю  кӯшишҳои якҷоя  метавонанд ҳам  дар  бахши  энергетика  ва  ҳам дар соҳаи   манбаъҳои  неруи алтернативӣ  ба  натиҷаҳои назаррас  муваффақ  шаванд.
Шариф  Саид  дар  навбати  худ  Чинро  шарики  боътимод  дар  соҳаи  энергетика,  сохтмон, таҷдиду  навсозии  роҳҳо,  пулу  нақбҳо, алоқаи телевизион,  кишоварзӣ  ва тандурустӣ  хонд.