Мулоқоти Шариф Саид бо Бандар Муҳаммад Ҷамил

Душанбе, 28.08.2014. (АМИТ «Ховар»,  Лайло Тоирӣ). – «Аҳли тиҷорати кишварҳои мо бояд бо назардошти  неруи  бузурги истифоданашуда  ҳамкориро  рушду  густариш  диҳанд», — зикр  намуд  раиси Палатаи  савдо  ва  саноати  ҶТ  Шариф  Саид дар  ҷараёни  мулоқот бо  сафири Шоҳигарии Арабистони  Саудӣ  дар  Тоҷикистон  Бандар  Муҳаммад  Ҷамил, ки  27  август  баргузор  гардид. 
Раиси  ПСС  ҶТ  зимни  суханрониаш имконоти  зиёдеро, ки барои  рушду  ҳамкорӣ  дар бахши инфрасохтор, тиҷорат, низоми бонкию  молиявӣ,  саноати  нафту  кимиё, энергетика, сохтмон ва ғайра  мавҷуд  аст, хотирнишон  сохт.
Ҷонибҳо  вазъи имрӯза  ва  дурнамои  равобити  тиҷоратию  иқтисодии Тоҷикистон ва  Арабистони  Саудиро бо назардошти  вусъат бахшидани  ҳамкории   соҳибкорони  ҳар  ду   кишвари  дӯст  мавриди  муҳокима  қарор  доданд.
Бандар  Муҳаммад  Ҷамил  иброз  дошт, ки  барои  рушди  равобити тоҷирон  ва  хусусан  рушди  ҳамкории  соҳибкорон ва ташкили  намоишгоҳу  ярмаркаҳо  чораҳои  мушаххас  хоҳанд  дид.