Натиҷаи қуръакашии ФФТ маълум шуд

Душанбе, 21.08.2014. (АМИТ “Ховар”, Ситораи Боймурод).-Дирӯз дар Душанбе қуръакашии 1/8 финали Ҷоми Тоҷикистон-2014 оид ба футбол баргузор гардид. 
Тавре ки дар ин бора Кумитаи миллии олимпии кишвар хабар додааст, дар қуръакашии даври ҳаштякниҳоии Ҷоми Тоҷикистон оид ба футбол дар маҷлисгоҳи Федератсияи футболи Тоҷикистон ҳамаи 10 дастаи лигаи олӣ — «Истиқлол» (Душанбе), «Хайр» (Ваҳдат), «Парвоз» (Бобоҷон Ғафуров), «Хуҷанд» (Хуҷанд), «Энергетик» (Душанбе), «Вахш» (Қӯрғонтеппа), «Регар-ТадАЗ» (Турсунзода), «Далерон-Ӯротеппа» (Истаравшан), «Равшан» (Кӯлоб) ва ССКА «Помир» (Душанбе), инчунин, панҷ дастаи лигаи аввал — «Саройкамар» (Панҷ), «Ҳосилот» (Фархор), «Эсхата» (Хуҷанд), «Ваҳдат» (Ашт) ва  «Исфара» (Исфара», ки аз даври интихобӣ гузаштаанд, ширкат варзиданд. 
Гуфта мешавад, ки бозиҳои аввали даври 1/8-ниҳоӣ 27-уми августи соли равон, бозиҳои ҷавобӣ 8-уми сентябр баргузор мешаванд.
Дастаи «Вахш»-и Қӯрғонтеппа бар асоси қуръакашӣ барои Ҷоми Тоҷикистон-2014 аз даври чорякниҳоӣ мубориза мебарад. Рақибаш ғолиби ҷуфти «Хайр»/«Далерон-Ӯротеппа» мешавад.
Бозии ниҳоии Ҷоми Тоҷикистон имсол 22-юми ноябри соли ҷорӣ дар Варзишгоҳи марказии Душанбе барпо мегардад.