Омодагирии Тоҷикистон ба тасдиқи Муоҳадаи СММ

Душанбе, 21.08.2014. (АМИТ «Ховар», Марҳабои  Азамат). – Соли  2014 аз буҷаи давлатии  Ҷумҳурии  Тоҷикистон  барои  ҳифзи  иҷтимоии аҳолӣ 46  миллиону  757 ҳазор  сомонӣ  ҷудо  карда шуд.  Тасмим  гирифта  шудааст, ки то  соли 2017  ин  маблағ ба  63  миллиону  900  ҳазор  сомонӣ расонида шавад.
Мушовири  миллии Раёсати  масоили иқтисодию  иҷтимоии СММ Ҷамшед  Қуддусов зимни  гузоришаш  дар  мавзӯи «Таҳлили  имконоти  иқтисодии  Ҷумҳурии  Тоҷикистон  барои  тасдиқи  Муоҳадаи  СММ  дар  бораи ҳуқуқҳои  маъюбон»  дар Конфронси  байналмилалии  «Омӯзиш» ва  табодули таҷриба ҷиҳати  пайвастан  ба  Муоҳадаи  СММ  дар  бораи  ҳуқуқҳои маъюбон, ки  19  август  дар  шаҳри  Душанбе баргузор  шуд,  дар  ин  бора  хабар  дод.
Ҷамшед  Қуддусов  зимни  суханрониаш  зикр  намуд, ки соли  2013  собиқ Агентии ҳифзи  иҷтимоӣ,  шуғли  аҳолӣ  ва  муҳоҷират  ба  18  ҳазору 241  нафар  хидмати   иҷтимоӣ  расонид.
Мавсуф  ҳамчунин  ибрози  назар  кард, ки барои  тақвият  бахшидани  вуруди  молу  ашё  ва таҷҳизоти  зарурии  муосир  ба  кишвар  ҷиҳати  расонидани  хидмати  иҷтимоӣ  ба  нафарони имконияташон  маҳдуд  бояд  меъёрҳои   танзими  гумрукӣ ва  андозбандӣ ҷорӣ  карда шаванд.
Ёдовар  мешавем, ки  3  апрели  соли  2013  Президенти  кишвар Эмомалӣ  Раҳмон Фармони  рақами РП – 2200  «Дар  бораи тасдиқи   Муоҳада  перомуни ҳуқуқҳои маъюбон  ва Протоколи  факултативӣ  дар  бораи ҳуқуқҳои  маъюбон» – ро  имзхо  кард, ки  дар  ҳошияи  он Нақшаи  фаъолият  тарҳрезӣ  шуда  ва  тибқи  он  Тоҷикистон  Муоҳадаи  мазкурро  то  соли  2015  имзо  карданист.