«Паймон»- филми ҷадид дар синамои тоҷик

 
Душанбе, 22.08.2014. (АМИТ «Ховар», Зарангези Латиф).- Як гурӯҳ аз ҷавонони вилояти Суғд филми наверо бо номи “Паймон” наворбардорӣ кардаанд. Продюссери ин филм рӯзноманигори ҷавон Дилошӯб Орифзода ва коргардонаш Муҳиддини Музаффар мебошанд, ки қаблан филми ҳунарии “Ормонҳо”-ро сабт намудаанд. 
Гуфта мешавад, ки дар филми “Паймон” мушкили мубрами рӯзи ҷомеаи тоҷик — аз ҳам пошидани хонаводаҳои ҷавон ба саҳна оварда шуда, сенарияи он ба қалами Бахтиёр Каримов тааллуқ дорад. Нақшҳои калидии филми “Паймон”-ро ҳунармандони маъруфи тоҷик, аз ҷумла Қурбони Собир, Таҳмина Раҷабова, Сироҷиддин Ғафурӣ ва Хуршед Мустафоев иҷро кардаанд.
Хазинаи филми «Паймон» 212 ҳазор сомониро ташкил дода, лаҳзаҳои он дар маконҳои зебои шаҳри Хуҷанд, аз ҷумла қаҳвахонаи “Хушбахтӣ”, ширкати ширии “Афзали Суғд”, фурудгоҳи байналмилалии шаҳри Хуҷанд ва меҳмонхонаи “Эҳсон” ба навор гирифта шудаанд.
Осими Орифпур, директори филми “Паймон” дар шарҳи номи ин филм мегӯяд: “Зери мафҳуми “Паймон” паймонҳои баставу дар ниҳоят шикаста ниҳон аст. Паймони дӯст, паймони азиз, паймони ёр. Ҳар ном бояд ақаллан 30 дарсади маънии матлабро фаро гирад. Вожаи “паймон” ба мазмуни филмнома мувофиқ аст. Аз ин рӯ филм “Паймон” ном гирифт”.
Ин гурӯҳи ҷавонони вилояти Суғд мегӯянд, филми ба навор гирифтаи онҳо интизор меравад, моҳи сентябри соли ҷорӣ дар шаҳри Душанбе ба намоиш гузошта шавад. Таҳиягарони филми “Паймон” мегӯянд, барои дастгирӣ аз Лутфулло Давлатов, раҳбари муассисаи давлатии Телевизиони Сафина сипосгузоранд.